Այսօր Ազգային ժողովում Էդմոն Մարուքյանը ներողություն խնդրեց Ալեն Սիմոնյանի հասցեին հնչած հայտնի վիրավորանքի համար՝ նշելով, որ դա անում է, եթե որևէ մեկը դա վերագրում է Սիմոնյանի սրբությանը:
Ճեպազրույցից հետո Մարուքյանին մոտեցած Սիմոնյանը հայտարարեց, որ ընդունում է ներողությունները. «Շատ գնահատում եմ դա ու կոչ եմ անում ձեզ վերադառնալ ու աշխատել»:
Կողմերը բանավիճեցին նաև ծեծկռտուքի թեմայով: Մարուքյանը հայտարարեց, որ իրեն հետևից խփել են:
«Ոչ մեկը ձեզ հետևից չի խփել, տեսանյութ կա»,-հայտարարեց ԱԺ փոխխոսնակը:
«Նայեք ում հետ գործ ունենք»,-մի քանի անգամ կրկնեց Մարուքյանը՝ մատնաշելով Սիմոնյանին:
«Սաղ երկրագունդը նայել ա, Ալեն Սիմոնյանն ասում ա, որ չեն խփել»,-հավելեց Մարուքյանը:
«Դուք ուզում էիք, որ Ձեզ խփեին: Դուք էս մի տարի ա ուզում եք, որ Ձեզ խփեն, ամեն ինչ անում եք դրա համար»,-ասաց Սիմոնյանը:
«Նիկոլ Փաշինյան ա մեղավոր, որ դու այդպես խոսում ես, քանի որ չի դատապարտում ձեր քայլը»,-նշեց Մարուքյանը:
«Նիկոլ Փաշինյանն ինչ պետք է դատապարտում է»,-ասաց Սիմոնյանը: