Մամուլում լուրեր էին շրջանառվում, որ ԱԺ խոսնակ Արարատ Միզոյանն իր մտերիմների հայտնել է, թե Նիկոլ Փաշինյանն ու վարչությունը որոշել են, որ պատգամավոր Աննա Կարապետյանը պետք է մանդատը վայր դնի, սակայն պատճառը չեն ասում: Ըստ լուրերի՝ վերջին շրջանում Արարատ Միրզոյանը, Տիգրան Ավինյանը և Արսեն Թորոսյանը «մոտ-մոտ են անում միմյանց»։ Փաշինյանն Ավինյանին կասկածում է «պերեվառոտ» անելու ցանկության մեջ: Կարապետյանն իր հեղինակած նախագծով առաջարկել էր, որ Արարատ Միրզոյանը դառնա Անվտանգության խորհրդի անդամ, սակայն իմքայլականներն օրինագիծը տապալել են:
Բացի այդ՝ Աննա Կարապետյանը եղել է ՀՀԿ-ական նախկին պատգամավոր Հովհաննես Սահակյանի օգնականը:
Այս առնչությամբ այսօր՝ լրագրողների հետ զրույցի ժամանակ Աննա Կարապետյանն ասաց. «Նման բան չկա, ձեզ սխալ լուրեր են հասնում: Ուզում եմ հասկանալ, էդ լուրերը որտեղի՞ց եք գտնում: Հասկանում եմ, որ ինչ-որ ուժեր, ինչ-որ մարդիկ փորձում են պառակտում մտցնել «Իմ քայլը» խմբակցության մեջ, բայց դա չի հաջողվելու»,- ասել է պատգամավորը:
