Դերասանուհի, հաղորդվարուհի Նազենի Հովհաննիսյանը Ֆեյսբուքի իր էջում գրել է, որ անասելի շատ է ցավում Լեւոն Արոնյանի կնոջ՝ Արիանա Կաոիլին մահվան կապակցությամբ: Նա շեշտել է՝ ամենասարսափելին այն է, որ չեն կարողացել նույնիսկ տեսակցել նրան:
«Նկարի մեջ ժպտում ենք, իսկ ես հիմա նստած կսկիծով լալիս եմ, որովհետեւ սեր կորավ, որովհետեւ Արիանան սեր էր ու Լեւոնի սերն էր: Ցավս էնքան խորն է, որ ներս եմ գոռում… Որովհետեւ 33 տարեկան Արիանան էնքան բան էր ուզում անել ու դեռ կաներ, որովհետեւ Հայաստանն իր տունն էր վաղուց, որտեղ միշտ սպասում էր Լեւոնին, եւ հարազատի պես էր վերաբերվում… Ու հենց այդ «տունը» նրա կյանքը վերցրեց: Ինչո՞ւ է մահը, կամ ինչի՞ մասին, ո՞նց դիմանա սիրողն առանց իր սիրո, սիրտս կտոր-կտոր է լինում: Լյով ջան, ցավդ տանեմ, ընկեր, սիրտս ճեղքվեց, չեմ պատկերացնում՝ ոնց պիտի սփոփենք քեզ, ի՞նչ խոսքով կամ ինչո՞վ:
Հ.Գ. Ջերմ, հասարակ ու սովորական երջանկություն էր փնտրում աղջնակը, իր կյանքի երազանքներն իրականություն էր դարձնում, ուներ իր ամենակարեւոր հեքիաթը՝ իր սերը: Շատ եմ ցավում, անասելի շատ: Այսօր մահացավ իմ ընկեր` Լեւոն Արոնյանի կինն ու կյանքի ընկերը, մեր ընկերը՝ Արիանան: Ամենաահավորը, որ չկարողացանք նույնիսկ այցելել… Լույսի մեջ թող լինի ու միշտ մեր սրտում»,-գրել է Նազենին:
