Ռուսաստանի Դաշնության նախագահ Պուտինը նախօրեին հայտարարել է, որ նախագահական մինչ այդ ունեցած ժամկետների զրոյացում հնարավոր է, եթե հանրությունը հավանություն տա սահմանադրական փոփոխությանը, ու դա հնարավոր համարի Սահմանադրական դատարանը: Այդպիսով, Պուտինը Պետդումայի ելույթի ընթացքում փաստորեն հայտարարել է, որ դեմ չէ 2024 թվականից հետո նախագահական նոր ժամկետին: Հունվարին Պետդումայի վերին պալատի առաջ ունեցած ուղերձում նա հայտարարել էր սահմանադրական փոփոխությունների մասին և բավականին թափանցիկ ակնարկել, որ պատրաստվում է իշխանության փոխանցման: Դրանից անմիջապես հետո նա փոխեց կառավարությունը: Փոխվո՞ւմ են իշխանությունը փոխանցելու պուտինյան պլանները, նա մնո՞ւմ է:
Պետք է նկատել, որ այդ հարցում, թերևս, ինքը՝ Պուտինն էլ չունի ամբողջական պատկերացում և որոշում, ու այստեղ կա շատ օբյեկտիվ պատճառ:
Համաշխարհային իրավիճակը փոխվում է շատ արագ, և մենք գրեթե ամենօրյա ռեժիմով տեսնում ենք, թե ինչպես է փոխվում աշխարհը: Այդ փոփոխությունների բերած մարտահրավերների ծանրությունը Ռուսաստանի համար ահռելի է՝ թե՛ ներքին, թե՛ արտաքին իմաստով: Ըստ այդմ, Ռուսաստանը ներկայումս մի վիճակում է, երբ շատ բարդ է ծրագրել իշխանության հարցը քառամյա ժամկետով: Այդ իսկ պատճառով Պուտինը սկսել է խաղալ այդ հարցի վրա, որովհետև հարցը «բերանքսիվայր» թողնելը ինքնին ռիսկեր է պարունակում, մյուս կողմից հնարավոր չէ կայացնել որոշում և գնալ դրա կատարմանը, առավել ևս ուրվագծելով այն հրապարակայնորեն: Ըստ այդմ, թերևս վաղ է գնահատել՝ Պուտինը մնում է, կամ գնում: Ավելի ճիշտ կլինի թերևս ասել, որ այդ հարցն այլևս Պուտինը չի որոշում: Այդ հարցը որոշելու է ժամանակը, և նրանք, որոնք ամենից մեծ ազդեցությունն ունեն այդ ժամանակի վրա: Իսկ դրանք այն երկրներն են, որոնք ժամանակակից աշխարհի տեխնոլոգիական առաջատարներն են, տեխնոլոգիական հեղափոխության առաջատարները:
Մեծ հաշվով, այստեղ երկու բևեռներն ԱՄՆ-ն ու Չինաստանն են՝ հարակից մի քանի այլ խաղացողներով: ՌԴ-ն թերևս սկսում է իշխանության համար խաղ հենց նրանց հետ: Հայաստանը պետք է դիտարկի այդ գործընթացը և դրանում փնտրի սեփական դերը, որքան էլ դա վերամբարձ չհնչի: Ընդ որում, դա դեր չէ ԱՄՆ կամ Չինաստանի կողմ կամ դեմ, կամ ՌԴ կողմ կամ դեմ: Դա դեր է Ռուսաստանում իշխանության խնդրի լուծման գործում, և օբյեկտիվ դեր, հաշվի առնելով կովկասյան ռեգիոնի կենսական նշանակությունը Ռուսաստանի համար, և Հայաստանի առանցքային դերը ռեգիոնում:
1in.am
