«Աէրոֆլոտ» ավիաընկերությունը չեղարկել է «Շերեմետևոյից» SU1864 չվերթը։ Այս մասին տեղեկանում ենք «Զվարթնոց» օդանավակայանի թռիչքների առցանց տեղեկատվական տախտակից։
Չվացուցակի համաձայն` ինքնաթիռը պետք է Ռուսաստանի մայրաքաղաքից դուրս գար դեկտեմբերի 11-ին` Երևանի ժամանակով մոտավորապես ժամը 10:00-ին։
«Ռոսավիացիայի» տեղեկությունների համաձայն՝ «Վնուկովո» և «Դոմոդեդովո» օդանավակայաններում ինքնաթիռների ժամանման և մեկնման ժամանակավոր սահմանափակումներ են մտցվել։ Անվտանգության միջոցառումները կապված են անօդաչուների հարձակումների սպառնալիքի հետ։
Սահմանափակումների պատճառով հետաձգվել է նաև Եկատերինբուրգ-Երևան չվերթը։
Հիշեցնենք՝ վարչապետ Նիկոլ Փաշինյանի ինքնաթիռն օդային փակ տարածքի պատճառով չի կարողացել վայրէջք կատարել Մոսկվայում։
Baza-ի տվյալներով՝ Փաշինյանի ինքնաթիռը շուրջ 1 ժամ պտտվել է Տվերի մարզի վրայով՝ վայրէջք կատարելու թույլտվությանը սպասելով, բայց այն այդպես էլ չեն ստացել։ Ի վերջո, կառավարական ինքնաթիռն ուղարկել են Սանկտ Պետերբուրգի «Պուլկովո» միջազգային օդանավակայան, որտեղ գիշերը ժամը 1-ի սահմաններում այն վայրէջք է կատարել։
Նշենք, որ որպես պատճառ նշվում է ուկրաինական ԱԹՍ–ների հարձակումները, որի հետեւանքով Մոսկվայի օդանավակայաններում ավելի քան 170 չվերթ է հետաձգվել։
Հիշեցնենք, որ մինչ այս ՀՀ վարչապետը Գերմանիայի Դաշնային Հանրապետությունում էր ու հայտարարել էր, որ մեկնելու է Մոսկվա՝ մասնակցելու ԵԱՏՄ միջկառավարական խորհրդի նիստին։
