Քանի դեռ ՀՀ իշխանությունները քաղաքական և իրավական արդյունավետ միջոցներ չեն կիրառում, ինչ էլ մենք անենք գերիների հարցում, մեծ արդյունք չի տալու: Այս մասին լրագրողների հետ զրույցում ՄԱԿ-ի դիմաց բողոքի ակցիայի ժամանակ ասաց Արցախի նախկին պետնախարար Արտակ Բեգլարյանը:
«Մեր այս ակցիաներն ուղղված են նաև ՀՀ իշխանություններին ճնշելուն: Իրենք պետք է առավելագույնս տեր կանգնեն մեր պատանդներին, որոնք բոլորիս են ներկայացնում»,- ասաց նա:
Անդրադառնալով երեկ Բաքվի բանտից Ռուբեն Վարդանյանի հղած ուղերձին՝ Բեգլարյանն ասաց, որ այն շատ սպասելի էր:
«Լավ է, որ պարոն Վարդանյանը կարողացել է այդ ուղերձը հղել, հանգամանքները ներկայացնել, որը նշանակում է, որ ինչ կատարվում է, կեղծ է՝ բոլորի պարագայում: Սա մեզ լրացուցիչ հիմքեր է տալիս, որ ալիևյան ռեժիմի հանդեպ ճնշումները պետք է մեծանան, բայց այդ ճնշումը կմեծանան, եթե ՀՀ իշխանությունները կունենան այդ քաղաքական կամքը: Միջազգային կառույցները շատ ուղիղ ասում են, եթե ՀՀ օրակարգում այդ հարցը չկա, դուք ի՞նչ եք մեզանից ուզում, սա հստակ ուղերձ է բոլորիս»,- ասաց Արտակ Բեգլարյանը:
