Անմեղության կանխավարկածը չխախտելով՝ ուզում եմ ֆիքսել, որ որևէ կոնկրետ բան չենք ուզում ասել այդ անձանց վերաբերյալ, բայց շատ լավ առիթ է արձանագրելու, որ կոռուպցիոն դրսևորումները մեզ համար անընդունելի են: Այդ մասին, այսօր՝ ապրիլի 21-ին, Երևանի քաղաքապետարանի գործակարգավարական խորհրդակցության ժամանակ հայտարարեց քաղաքապետ Տիգրան Ավինյանը՝ անդրադառնալով Շենգավիթ վարչական շրջանի աշխատակազմում վերջին ձերբակալություններին։
Ավելի վաղ լրատվամիջոցները հայտնել էին, որ ԱԱԾ-ն հատուկ օպերացիա է իրականացրել Շենգավիթի թաղապետարանում։ Ըստ լուրերի, թաղապետարանի պաշտոնյաներից երկուսը, որոնք կասկածվում էին կաշառք պահանջելու և ստանալու մեջ, տեղափոխվել են ԱԱԾ։
«Այս մակարդակում ինչքա՞ն պետք է նման գործողություններ տեղի ունենան, որ մենք խաղի կանոնները հասկանանք»,- ասաց Ավինյանը՝ դիմելով Շենգավիթ վարչական շրջանի ղեկավար Ռազմիկ Մկրտչյանին:
Վերջինս նախ շնորհակալություն հայտնեց ԱԱԾ և Հակակոռուպցիոն կոմիտեի աշխատակիցներին արդյունավետ աշխատանքի համար, ապա արձանագրեց, որ որոշ ԶԼՄ-ների կողմից տարածվել էին լուսանկարներ, որոնք կարող էին ապակողմնորոշել հանրությանը:
«Տպավորությունն այնպիսին էր՝ կարծես ինձ են ձերբակալել: Իրականում և՛ զավեշտալի էր, և՛ տխրեցնող…
Դեպքը տեղի չի ունեցել վարչական շենքում և վարչական ղեկավարի ներկայությամբ. դա ևս լրատվամիջոցների կողմից ամբողջությամբ հակառակ ուղղությամբ ներկայացվեց»,- ասաց նա:
Անդրադառնալով դեպքի մանրամասներին՝ Ռազմիկ Մկրտչյանը պարզաբանեց. «Մեր աշխատակիցներից մեկն այս պահին տնային կալանքի տակ է, նախաքննությունը շարունակվում է, որևէ այլ բան չեմ կարող ասել։ Կարող եմ փաստել և վերահաստատել մեր դիրքորոշումը, որ համայնքային բյուջեից 1 լումա անգամ գողանալը, մեղմ ասած, սրիկայություն է»։
