ՀՀ ներքին գործերի նախարարության ոստիկանության քրեական ոստիկանության գլխավոր վարչության ծառայողները, ՀՀ քննչական կոմիտեի Լոռու մարզային քննչական վարչության հետ, հսկայածավալ օպերատիվ-հետախուզական և քննչական համատեղ գործողությունների շնորհիվ պարզել են Վանաձորում մարտի 9-ին տեղի ունեցած սպանության հանգամանքները, մասնակիցների ինքնությունը և դեպքի վայրը:
Shamshyan.com-ի փոխանցմամբ՝ ոստիկաններն ու քննիչները պարզել են, որ այդ օրը ժամը 03:40-ի սահմաններում «Toyota» մակնիշի ավտոմեքենայով Վանաձորի բժշկական կենտրոն է տեղափոխվել Ալավերդի քաղաքի բնակիչ 28-ամյա Արտյոմ Նիազյանի դին: Պարզվել է նաև, որ այդ օրը՝ ժամը 02:00-ի սահմաններում Ա. Նիազյանը իր մտերիմ, Ալավերդի քաղաքի բնակիչ 27-ամյա Գրիգոր Հակոբյանի հետ գնացել են Վանաձոր քաղաքի «Դերձանիկ» ակումբի մոտ, որտեղ հանդիպել են իրենց ընկեր, Ալավերդի քաղաքի բնակիչ 22-ամյա Արման Միկոյանին, ապա մտել են նշված ակումբ, որտեղ էլ ժամը 03:00-ի սահմաններում վիճաբանություն է տեղի ունեցել նշված անձանց և այնտեղ գտնվող, Վանաձորի բնակիչներ 33-ամյա Դավիթ Ղազարյանի և 40-ամյա Արմենակ Մկրտչյանի հետ: Այնուհետև վիճաբանությունը շարունակվել է Վանաձոր քաղաքի Մհեր Մկրտչյան փողոցում գտնվող «Երևան Սիթի» սուպերմարկետի դիմացի հատվածում, որը վերածվել է ծեծկռտուքի ու ըստ օպերատիվ տեղեկությունների՝ Ա. Մկրտչյանը իր մոտ եղած դանակով հարվածել է Ա. Նիազյանի կրծքավանի շրջանին, ապա կռվի բոլոր մասնակիցները դիմել են փախուստի, իսկ Ա. Միկոյանը «Toyota» մակնիշի ավտոմեքենայով մահացածի մարմինը տեղափոխել է «Վանաձոր» բժշկական կենտրոն:
Կայքի տեղեկություններով՝ արդեն մարտի 10-ին քրեական ոստիկանության գլխավոր վարչությունում և Լոռու մարզային քրեական վարչությունում օպերատիվ տեղեկություններ են ստացվել, որ կասակծյալներից Ա. Մկրտչյանը թաքնվում է Վանաձոր քաղաքի իր ընկերոջ՝ 35-ամյա Բագրատ Ասոյանի տանը:
Ոստիկանները այցելում են նշված հասցե և դուռը բացում է Բ. Ասոյանը, ում ձեռքին ոստիկանները նկատում են դանակ: Վերջինս սկսում է ոստիկանների նկատմամբ ագրեսիվ վարաքագիծ դրսևորել ու հարձակվում է նրանց վրա՝ փորձելով հարվածել ոստիկանության ծառայող 38-ամյա Տարոն Այվազյանին: Վերջինս, վտանգելով իր կյանքը, կարողանում է վնասազերծել Բ. Ասոյանին: Վնասազերծման ընթացքում Բ. Ասոյանը դանակով հարվածում է ոստիկանության ծառայողի աջ ոտքին՝ պատճառելով մարմնական վնասվածք, ինչից հետո վիրավոր ոստիկանը տեղափոխվում է «Վանաձոր» բժշկական կենտրոն: Բ. Ասոյանը տեղափոխվում է ոստիկանություն, որտեղից էլ ներկայացվում է ՀՀ քննչական կոմիտեի Լոռու մարզային քննչական վարչություն, որտեղ էլ ձերբակալվում է:
Հիշեցնենք՝ մարտի 9-ին առեղծվածային մահվան դեպք էր տեղի ունեցել Լոռու մարզում։ Ժամը 03:40-ի սահմաններում ՀՀ Ներքին գործերի նախարարության Ոստիկանության քրեական ոստիկանության գլխավոր վարչության Լոռու մարզի քրեական վարչությունում օպերատիվ տեղեկություններ էին ստացվել, որ անհայտ անձի կողմից մահացած վիճակում «Վանաձոր» բժշկական կենտրոն է տեղափոխվել տղամարդու դի։
Ոստիկաններն ու քննիչները պարզել էին, որ մահացածը Լոռու մարզի բնակիչ 29-ամյա Արտյոմ Ն.-ն է, ով կրծքավանդակի հատվածում ունի կտրած-ծակած վերք և ըստ նախնական տեղեկությունների դեպքը տեղի ունեցել Վանաձոր քաղաքի Արցախի պուրակի հարևանությամբ գտնվող «Երևան Սիթի»-ի մոտ։Դեպքի փաստով Լոռու մարզային քննչական վարչությունում «սպանություն» հատկանիշներով նախաձեռնվել էր քրեական վարույթ։Քննիչի որոշմամբ նշանակվել էր դիակի դատաբժշկական փորձաքննություն։
