Մոլդովայի մայրաքաղաք Քիշնեւում ավարտված Եվրոպայի առաջնությունում տեղի ունեցավ տղամարդկանց +109 կգ քաշային կարգի հաղթողի եւ մեդալակիրների պարգեւատրումը:
Վարազդատ Լալայանը պարգեւատրվեց այս քաշային կարգի երեք ոսկե մեդալներով:
Երկրորդ անգամ տիտղոսը նվաճած Լալայանին պարգեւատրեց եռակի օլիմպիական չեմպիոն, աշխարհի ու Եվրոպայի յոթակի չեմպիոն, արդեն նախկին ծանրորդ Լաշա Տալախաձեն, որն այժմ Վրաստանի ծանրամարտի ֆեդերացիայի նախագահն է:
Լաշա Տալախաձեն Լալայանին պարգեւատրելուց հետո բարձրացավ պատվո հարթակի առաջին աստիճանին եւ լուսանկարվեց հայ ծանրորդի հետ:
Քիշնեւի մարզադահլիճում Լալայանի պատվին հնչեց Հայաստանի հիմնը:
Փարիզի Օլիմպիական խաղերի փոխչեմպիոն, աշխարհի չեմպիոն Վարազդատ Լալայանը Եվրոպայի առաջնությունում երկամարտում գրանցեց 450 կգ (210+240): Արծաթե մեդալը երկամարտի 415 կգ արդյունքով նվաճեց էստոնացի Մարտ Սեյմը (180+235): Բրոնզե մեդալակիր դարձավ ուկրաինացի Բոգդան Գոզան, որը երկամարտում գրանցեց 406 կգ արդյունք (190+216):
