Իսրայելի պաշտպանության բանակը կոչ է անում հարավային Լիբանանի 37 գյուղերի և քաղաքների բնակիչներին անհապաղ տարհանվել և շարժվել Ավալի գետից հյուսիս, հայտնում է Times of Israel-ը:
Վերջին օրերին Իսրայելի բանակը Լիբանանի հարավում գտնվող տասնյակ բնակավայրերի, այդ թվում՝ Լիտանի գետից հյուսիս գտնվողների բնակիչներին, կոչ է արել տարհանվել:
««Հեզբոլլահ»-ի գործունեությունը ստիպում է Իսրայելի պաշտպանության բանակին գործել նրա դեմ։ Իսրայելի պաշտպանության բանակը չի ցանկանում վնասել ձեզ: Ձեր անվտանգության համար դուք պետք է անհապաղ տարհանվեք: Յուրաքանչյուր ոք, ով գտնվում է «Հեզբոլլահ»-ի օպերատորների, նրանց օբյեկտների կամ զենքերի մոտ, իրեն վտանգի է ենթարկում», — նշել է Իսրայելի պաշտպանության բանակի արաբալեզու խոսնակ Ավիչայ Ադրեյը X-ի հաղորդագրության մեջ:
Իսրայելի պաշտպանության բանակը նաև նշել է, որ խաղաղ բնակիչներին կտեղեկացնի, երբ վերադարձն անվտանգ լինի:
Տարհանումները տեղի են ունենում հարավային Լիբանանում Իսրայելի ցամաքային գործողությունների ֆոնին: Դրանց նպատակն է քանդել «Հեզբոլլահ»-ի ենթակառուցվածքը սահմանային գոտում: Իսրայելի պաշտոնյաները հայտարարել են, որ զինվորականները մտադիր են հնարավորինս արագ ավարտել գործողությունները։
