Հազարավոր թեհրանցիներ հինգշաբթի առավոտյան դուրս են եկել փողոցներ՝ մասնակցելու Թեհրանում ՀԱՄԱՍ-ի քաղաքական բյուրոյի ղեկավար Իսմայիլ Հանիեին վերջին հրաժեշտին, հայտնում է Mehr գործակալությունը:
Արարողությունը սկսվել է առավոտյան ժամը 8-ին Թեհրանի համալսարանում ժողովրդի և պաշտոնատար անձանց ներկայությամբ։
Մասնակիցները Հանիեի սպանությունը դատապարտել են որպես ահաբեկչական գործողություն և հայտարարել, որ տեղի է ունեցել Իսլամական Հանրապետության ինքնիշխանության խախտում:
Նրանք կարգախոսներ են վանկարկել ընդդեմ Իսրայելի և նրա դաշնակիցների, այդ թվում՝ ԱՄՆ-ի, և պահանջել են վճռական պատասխան տալ մեղավորներին:
Ինչպես հավելում է ՏԱՍՍ-ը, պաղեստինյան ՀԱՄԱՍ շարժումը հաստատել է, որ Թեհրանում սպանված շարժման քաղբյուրոյի ղեկավար Իսմայիլ Հանիեի հուղարկավորությունը տեղի կունենա հաջորդ ուրբաթ օրը՝ օգոստոսի 2-ին, Դոհայում։ Պաշտոնական հայտարարության տեքստը հրապարակվել է ՀԱՄԱՍ-ի Telegram ալիքում։
Հիշեցնենք, որ անցած գիշեր Թեհրանում սպանվել է ՀԱՄԱՍ շարժման քաղաքական բյուրոյի ղեկավար Իսմայիլ Հանիեն։ Ինչպես հաղորդում է Mehr գործակալությունը՝ հղում անելով Իսլամական հեղափոխության պահապանների կորպուսի (ԻՀՊԿ, Իրանի զինված ուժերի էլիտար ստորաբաժանումներ) հայտարարությանը, Հանիեն սպանվել է իր բնակության վայրի վրա հարձակման ժամանակ։
