Երբ հայկական ավիացիան հայտնվեց Եվրոպական միության թռիչքային անվտանգության «սև ցուցակում»՝ ՀՀ կառավարությունը փորձեց նախանշել այն կետերը, որոնք դրա համար հիմք են հանդիսացել։ Այս մասին այսօր հայտարարել է ՀՀ տարածքային կառավարման և ենթակառուցվածքների նախարար Գնել Սանոսյանը՝ անդրադառնալով դիտարկմանը, թե երբ հայկական ավիացիան դուրս կգա սև ցուցակից:
«Հայկական ավիացիան «սև ցուցակում» հայտնվել է հայտնաբերված 41 թերության պատճառով։ Ես կարող եմ ասել, որ 40 թերությունները վերացված են, իսկ մեկ թերությունն արդեն կվերացվի դեկտեմբերին։ Մեր գլխավոր խնդիրը եղել է տեսուչների, մասնագետների պակասը, որի մի մասն արդեն իսկ լրացրել ենք, ևս մի քանի մասնագետ ունենք, որ վերապատրաստման փուլում են, դասընթացներ են անցնում, ու դրանք կավարտվեն դեկտեմբերի կեսերին»,- ասել է նա:
