Հայաստանում մենինգոկոկային վարակի պատճառով մահ է արձանագրվել։ Տեղեկությունը հայտնում է Հիվանդությունների վերահսկման և կանխարգելման ազգային կենտրոնը։
«Սեպտեմբերի 9-ին Վայոց Ձորի մարզի բնակչի մոտ ախտորոշվել է «մենինգիտ, մենինգոկոկցեմիա»: Նա հոսպիտալացվել է ծանր վիճակով, սակայն, ցավոք, հաջորդ օրը հիվանդի մոտ արձանագրվել է կենսաբանական մահ»,–նշված է հաղորդագրության մեջ:
Կենտրոնից հայտնում են, որ համաճարակաբանական հետազոտությունը և վարակի տարածման կանխարգելմանն ուղղված բոլոր անհրաժեշտ միջոցառումները իրականացված են: Սերտ կոնտակտավորների շրջանում հսկողությունը շարունակվում է տնայցերով:
Կենտրոնը հիշեցնում է` մենինգոկոկային վարակը սուր վարակիչ հիվանդություն է, որը հարուցվում է մենինգոկոկերի կողմից։ Վարակը փոխանցվում է օդակաթիլային ճանապարհով: Բնակչության 1-10%-ը կրում են մենինգոկոկային մանրէն բկանցքում առանց որևէ ախտանշանի և կարող են վարակը փոխանցել այլ անձանց։ Հիվանդության ախտանշանները` բարձր ջերմություն, ուժեղ գլխացավ, պարանոցի կարկամում, սրտխառնոց, փսխում, մաշկի վրա հատուկ կարմիր-մանուշակագույն ցան (ավելի ուշ փուլում) և այլն։ Մենինգոկոկային վարակից պաշտպանվելու 2 տարբերակ կա` պատվաստում և կանխարգելիչ հակաբիոտիկոթերապիա։
Հիվանդության ախտանշանների դեպքում պետք է անհապաղ դիմել բժշկի։
