Գյումրիի համայնքապետի թեկնածու Կարեն Սարուխանյանի ազգականը թմրանյութ պահելու ու օգտագործելու կասկածով օրերս ձերբակալվելուց, ապա ազատ արձակվելուց հետո «Քաղացիական պայմանագրից» դուրս գալու դիմում է գրել, «Ազատությանը» հայտնեց Սարուխանյանը։
Վարուժան Խոջումյանը իշխող կուսակցության Գյումրիի տարածքային կազմակերպության խորհրդի անդամ էր: Նա տարածքային կառույցի ղեկավար Սարուխանյանի մորեղբոր որդին է։
Խոջումյանի հետ նաև ավագանու ՔՊ-ական անդամներից մեկն էր ձերբակալվել:
Սարուխանյանի փոխանցմամբ՝ իր ազգականը դիմումում գրել է. «Հաշվի առնելով վերջին օրերի իրադարձությունները, ինչպես նաև որոշ լրատավականների բարձրացրած աղմուկը իմ անձի շուրջ՝ որոշում եմ կայացրել սեփական դիմումիս համաձայն դուրս գալ ՔՊԿ Գյումրու խորհրդի կազմից և ՔՊ կուսակցությունից»:
Ըստ կուսակցության կանոնակարգի՝ դիմումը գրելու պահից մեխանիկորեն դադարեցվում է և՛ խորհրդի, և՛ կուսակցությանն անդամակցությունը։
Անդրադառնալով իր ազգականի ձերբակալությանը՝ Սարուխանյանն «Ազատությանն» ասել էր՝ ամեն մարդ իր արարքի համար է պատասխանատու։
