«Ես մանդատ վայր դնելու մտադրություն չունեմ, նման խոսակցություններ էլ չեմ լսել»,- այս մասին «24Նյուզ»-ի հետ զրույցում նշել է ԱԺ «Հայաստան» խմբակցության պատգամավոր Գեղամ Նազարյանը՝ անդրադառնալով մամուլում տարածվող տեղեկատվությանը, թե ընդդիմադիր խմբակցությունում բարձրացվելու է իր՝ պատգամավորական լիազորություններից հրաժարվելու հարցը։
Աղբյուրի տեղեկացմամբ, անդրադառնալով դիտարկմանը, որ «Հայաստան» խմբակցությունը այդ հարցն է առաջիկայում քննարկելու, և Աղվան Վարդանյանն էլ հաստատել է այդ տեղեկատվությունը, Նազարյանը նշել է․ «Իրենք ո՞նց կարող են քննարկել էդ հարցը»։
Դիտարկմանը, թե այնպես, ինչպես եղավ ՔՊ-ի պարագայում, խնդրեցին, մանդատը վայր դրեց պատգամավորը, Նազարյանն արձագանքել է․ «Ինձ չեն կարող խնդրել»։
Հիշեցնենք, որ սոցիալական ցանցերում ու մամուլում քննարկվել էր Գեղամ Նազարյանի ու Ալեն Սիմոնյանի համատեղ նկարը՝ այլ ՔՊ-ականների հետ, որն արվել է Վիետնամում գործուղման ժամանակ։ «Հայաստան» դաշինքում վաղուց կար խուլ դժգոհություն, որ Նազարյանն ակտիվ համագործակցում է ՔՊ-ի՝ հատկապես իր համերկրացի ու Նիկոլ Փաշինյանի քավոր Վահե Ղալումյանի հետ, սակայն հիմա, ինչպես երևում է, որոշել են հարցը հանրայնացնել։
