Բազմաթիվ քաղաքացիներ պարզապես չեն տիրապետում այդ բազային գիտելիքներին. Էլեն Մանասերյանը համոզված է՝ հայտարարագրման համակարգի ներդրումն իր նպատակին չի ծառայի

«Քաղաքացիների համոզմամբ, այս ամենն արվում է, որ հետո տուգանքի ենթարկվեն: Բայց նաև այս ամեն ինչի պատճառն այն է, որ քաղաքացիներին չէին պատրաստել այս ամենին»,- Մեդիա կենտրոնում կայացած «Ի՞նչ խնդիր է իրականում լուծում համընդհանուր եկամտի հայտարարագիրը» թեմայով քննարկման ժամանակ նշեց Հայաստանի արհմիությունների կոնֆեդերացիայի նախագահ Էլեն Մանասերյանը։ «Նորմալ է և արդարացի է քաղաքացիների բողոքը, որովհետև դաշտը դատարկ է, դրա համար լցվեց ապատեղեկատվությամբ: Իրազեկվածության բացը բերում է ցայտնոտի: Սա լրացուցիչ բեռ է աշխատող մարդու համար՝ հաշվի առնելով այն հանգամանքը, որ մենք ունենք բազմաթիվ աշխատող աղքատներ: Մարդը պետք է ունենա էլեկտրոնային ստորագրություն, ինչի համար պետք է վճարի 3000 դրամ, պիտի անպայման բջջային հեռախոսի մեջ համակարգն ակտիվացնելու համար քարտը փոխի, որն արժի մոտավորապես 500 դրամ, հետո կրկին պետք է վճարի այլ գումարներ: Անկախ նրանից, թե դա 1000 դրամ է, թե՝ 10000 դրամ, աշխատողի համար լրացուցիչ բեռ է: Մարդը չէր նախատեսել իր ծախսերի մեջ այդ 1000 կամ 3000 դրամը: Հաջորդը՝ մենք ունենք բազմաթիվ քաղաքացիներ, ովքեր պարզապես չեն տիրապետում այդ բազային գիտելիքներին: Հիմա արդեն գովազդներ կան հաշվապահական ծառայությունների, որոնք 15000 դրամի դիմաց առաջարկում են հայտարարագրել քո եկամուտները: Այսինքն, մենք ցանկացած աշխատողի վրա լրացուցիչ բեռ ենք դնում»: Էլեն Մանասերյանի կարծիքով հայտարարագրման համակարգի ներդրումն իր նպատակին չի ծառայի։