«Ազատություն քեզ, Դավի՛թ ջան»․ այսօր Դավիթ Բաբայանի ծնունդն է

Այսօր Բաքվի բանտում գտնվող Դավիթ Բաբայանի ծնունդն է:

«Դավիթին արդեն 15 տարի է՝ ճանաչում եմ, դեռ չեմ խոսում այն մասին, որ դրանից 4-ը` միասին աշխատել ենք Արցախի նախագահի աշխատակազմում:

Ամբողջ կյանքը գիտությանն ու պետական ծառայությանը նվիրած մարդն այսօր բանտում է, այն էլ` ադրբեջանական:

Իր ընտանիքին ու երկրին նվիրված մարդ, ով անչափ սիրում էր Արցախն ու անմնացորդ նվիրված էր իր հայրենիքին:

Դավի՛թ ջան, ծնունդդ շնորհավոր:

Ազատություն քեզ ու Բաքվի բանտերում գտնվող բոլոր հայերին», — գրել է ԱԺ պատգամավոր Տիգրան Աբրահամյանը։

Հիշեցնենք, որ 2023թ․ սեպտեմբերի 28-ին Դավիթ Բաբայանն իր ֆեյսբուքյան էջում տեղեկացրել էր Ստեփանակերտից Շուշի մեկնելու որոշման մասին։

Նա նշել էր, որ ընդգրկված է Ադրբեջանի սեւ ցուցակում, և ադրբեջանական կողմը պահանջել է իր ժամանումը Բաքու՝ համապատասխան հետաքննության համար․

«Իմ չներկայանալը կամ ավելի վատ՝ փախուստը լուրջ վնաս կհասցնի մեր բազմաչարչար ժողովրդին, շատ ու շատ մարդկանց, և ես՝ որպես ազնիվ մարդ, աշխատվոր, հայրենասեր և քրիստոնյա, չեմ կարող դա թույլ տալ»։