Ռազմական փորձագետ Վահագն Սարոյանը ֆեյսբուքյան էջում գրում է․ «Հայ հասարակությունից գողացված տոների շարքում արդեն ութերորդ տարին է, ինչ Նոր տարին այլևս չի բերում տոնական տրամադրություն։ Շատ ընտանիքներ այդ օրը պարզապես չեն տոնում, չեն էլ շնորհավորում միմյանց։ Հազարավոր մարդիկ այդ գիշերը անցկացնում են Եռաբլուրում, եկեղեցիներում՝ լռության ու հիշողության մեջ։ Իսկ թե ինչու՝ հարցնել պետք չէ. պատասխանն ամեն մեկին հայտնի է։
Նոր տարվան նախորդող օրերին, ինչպես միշտ, սկսվում է հետահայաց գնահատականը՝ ինչպիսին էր անցնող տարին պետության ու հասարակության համար․ անվտանգության, արտաքին քաղաքականության, ներքաղաքական լարվածության տեսանկյունից։ Եվ այդ գնահատականը, ցավոք, տարեցտարի նույն եզրահանգման է բերում։
Այս իշխանությունների օրոք արդեն ութերորդ տարին անընդմեջ չկա մի ոլորտ, որտեղ կարելի է արձանագրել իրական հաջողություններ։ Ավելին՝ հասարակությունը գտնվում է մշտական թունավորման և պառակտման գործընթացում՝ ենթարկվելով անվերջ, նպատակային «դոզավորման»»։
