Մանրամասն չգիտեմ, թե Աննա Հակոբյանն ո՞ւմ հետ, ո՞ւմ հաշվին է գնացել Տանզանիա, դուք եթե գիտեք, ուրեմն դուք էլ կիմանաք՝ շահերի բախում կա՞, թե՞ ոչ: Այս մասին, այսօր՝ նոյեմբերի 12-ին, ԱԺ-ում լրագրողների հետ զրույցում ասաց Աննա Հակոբյանի եղբայր, ՔՊ-ական պատգամավոր Հրաչյա Հակոբյանը՝ անդրադառնալով հարցին, թե արդյոք շահերի բախում չկա, որ վարչապետի կինը Տանզանիայում տուրերի է մասնակցում ռուսաստանցի մեծահարուստ Իգոր Կոստանովի կնոջ եւ դստեր հետ:
Դիտարկմանը՝ արդյո՞ք նոյեմբերի 9-ին այնտեղից լուսանկարներ հրապարակելը ճիշտ է համարում՝ Հակոբյանը պատասխանեց. «Դա էլ չեմ կարող մեկնաբանել, քանի որ չեմ տեսել, թե երբ է հրապարակել։ Հետևում եմ իրենց սոցիալական էջերին, սակայն այդ հրապարակումը չի հանդիպել»։
Նա ավելացրեց, որ իր համար նոյեմբերի 9-ը շատ ցավոտ օր է եղել. «Այդ օրը եղել եմ Երևանում, Եռաբլուր այս տարի չեմ գնացել»։
Այնուհետև Հակոբյանն ուղղեց իրեն՝ նշելով, որ Երևանում չի եղել. «Ինձ թված 2020 թվականի նոյեմբերի 9-ի հետ էիք։ Այս տարի այստեղ չեմ եղել։ Իշխանությունը տարբեր օրերի այցելում է Եռաբլուր, հարգանքի տուրք է մատուցում և՛ 2020 թվականի պատերազմի զոհերին, և ընդհանրապես բոլոր զոհերի հիշատակին»։
Լրագրողները հետաքրքրվեցին, թե ինչպե՞ս է ստացվում, որ Ադրբեջանի նախագահի կինը նոյեմբերի 9-ին հրապարակում է՝ ինչպես է իրենց դրոշը ծածանվում Ստեփանակերտում, իսկ մեր վարչապետի կինը Տանզանիայից է լուսանկարներ տեղադրում՝ Հակոբյանն ի պատասխան նշեց. «Ադրբեջանի նախագահի կնոջն առհասարակ չեմ հետեւում, թե ինչ հրապարակումներ է անում: Եթե Աննա Հակոբյանին հետևում եմ, ուղղակի չէի տեսել, Ադրբեջանի նախագահի կնոջն առհասարակ չեմ հետևում, թե ինչ է անում։ Ես չէի ասի, որ հանրությունը հետեւում է, որոշ լրատվամիջոցներ ավելի շատ հետևում են Ադրբեջանի նախագահի ընտանիքի հետ կապված հրապարակումներին, քան, օրինակ, մեր երկրի որոշ պաշտոնյաներին»։
