«Մեր ձևով» ժողովրդական շարժման համակարգող Նարեկ Կարապետյանը լրագրողների խնդրանքով արձագանքեց իշխանության պնդումներին, թե Ադրբեջանից բենզին ներկրելը «տնտեսապես շահավետ է»։
«Ինչպես ԶԼՄ-ներն են նշում, 1,5 միլիոն դոլարի ադրբեջանական բենզին է ներմուծվել։ Ըստ Ադրբեջանի հարկային ծառայության տվյալների, երկրում ՀՆԱ/հարկեր հարաբերակցությունը 20-ից 25 է։ Այսինքն, դրանից մոտ 250-300 000 դոլարը որպես հարկ՝ գնացել է Ադրբեջանին։ Ադրբեջանական պետության ծախսերի 30-40 տոկոսը, կամ մի քիչ ավելի քիչ, ռազմական ծախսերն են։ Ուրեմն՝ մենք 1,5 միլիոն դոլարի բենզին բերելով, իմ հաշվարկով, մոտավորապես 80-ից 100 000 դոլարով ֆինանսավորել ենք ադրբեջանական բանակին»,- ասաց Կարապետյանն, ապա հռետորական հարց հնչեցրեց՝ վտանգ չենք տեսնու՞մ՝ ի դեմս Ադրբեջանի։
«Այդ կարգի վտանգ չենք տեսնու՞մ, որ արդեն ֆինանսավորում ենք իրենց։ Երբ մենք գնում ենք բենզին, SOCAR-ը հարկ է տալիս։ Հարկը գնում է նավթային ֆոնդ, նավթային ֆոնդը փոխանցում է բյուջե, բյուջեն էլ տալիս է բանակին։ Բանակը գնում է ռազմական տեխնիկա, օգտագործում հայ զինվորների դեմ՝ մեր ազգանունով՝ իմ և ձեր։ Արդյոք այդ կարգի վտանգ չկա՞ նրանցից, որ մենք ֆինանսավորում ենք իրենց բանակը»,- ՔՊ-ականների պնդումներին ի պատասխան՝ ասաց Նարեկ Կարապետյանը։
