SHAMSHYAN.com-ի տեղեկություններով երեկ՝ հուլիսի 4-ին, ՀՀ Ներքին գործերի նախարարության Ոստիկանության Կենտրոնական բաժնի քրեական հետախուզության բաժանմունքի ծառայողները՝ բաժնի պետ Երվանդ Նիկոյանի, բաժնի պետի օպերատիվ գծով տեղակալ Վազգեն Թադևոսյանի և ոստիկանության Մարաշի բաժանմունքի քրեական հետախուզության խմբի ծառայողների՝ բաժանմունքի պետ Մառլեն Հակոբյանի գլխավորությամբ, օպերատիվ տեղեկություններով պարզել են հունիսի 1-ին Կողբացի փողոցում ինչ մակնիշի և համարանիշի ավտոմեքենայի միջից են «տաք գլուխները» կրակոցներ արձակել։
Ոստիկանները այնուհետև վստահ լինելով օպերատիվ տեղեկությունների հավաստի լինելու մեջ, պարզել են, որ ավտոմեքենայի մեջ են եղել Երևանի բնակիչ 30-ամյա Դավիթ Հարությունյանը, Արմավիրի մարզի բնակիչ 30-ամյա Արման Նիկոլյանը և Երևանի բնակիչ 33-ամյա Տիգրան Մարկոսյանը։
Այնուհետև քրեական հետախուզության բաժանմունքի ծառայողները կատարում են բացատրական աշխատանքներ, ինչի արդյունքում երեկ՝ հուլիսի 4-ին, Ա. Նիկոլյանն ինքնակամ ներկայանում է ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների 1-ին քննչական բաժին, որտեղ դեպքի փաստով նախաձեռնվել է քրեական վարույթ։
