Քաղաքագետ Սուրեն Սուրենյանցի թելեգրամյան գրառումը․ ««ՀՀ-ում ԱՄՆ զորավարժությունները, ֆրանսիական զենքի մատակարարումները և ԵՄ ռազմական օգնությունը ոգեշնչում են Հայաստանին և նախապատրաստում Ադրբեջանի հետ նոր հակամարտությանը»,- հայտարարել է Ադրբեջանի ՊՆ-ն, ապա սպառնացել է. «Եթե Ադրբեջանի դեմ սադրանքները չդադարեն, ինքնապաշտպանական միջոցներ կձեռնարկվեն»:
Ի դեպ, ուշագրավ է, որ Բաքուն հոխորտում է ամերիկացի համանախագահի հայաստանյան «խաղաղասիրական» այցի համատեքստում:
Սա խիստ կանխատեսելի սցենար է, ինչի մասին վերջին մի քանի օրերին անդադար խոսել եմ գրեթե բոլոր հարցազրույցներում:
Ադրբեջանն այս պահին խաղաղության պայմանագիր կնքելու որևէ մոտիվացիա չունի, հակառակը՝ նրա խնդիրն է թուլացնել Հայաստանը՝ նրանից կորզելով զիջում, այսպես ասած, «միջանցքային» տրամաբանության մեջ:
Ի հեճուկս մեր պսևդոարևմտամետների «պերճախոս» պնդումների՝ Արևմուտքը որևէ լծակ չունի, որպեսզի զսպի Ադրբեջանին (մեծ իմաստով՝ ցանկություն էլ չունի):
Միակ բանը, որ Արևմուտքը կարող է անել ու վերջին երկու տարիներին «հաջողությամբ» արել է՝ հակելն է Հայաստանին Ադրբեջանի հետ հարաբերություններում գնալ նշաձողի նոր իջեցման: Դրա մասին էր ԱՄՆ պետքարտուղարության խոսնակ Մեթյու Միլերի վերջին հայտարարությունը:
Այս ամենին ավելացել է մեկ խնդիր ևս:
Բայդենի ինքնաբացարկից հետո, ԱՄՆ գործող վարչակազմը «կաղ բադիկի» կարգավիճակում է լինելու վեց ամիս: Իսկ սա միջազգային ուշադրության լուրջ վակուում է ստեղծելու տարածաշրջանում, ինչը հնարավորությունների «պատուհան» է Ադրբեջանի համար:
Սա այն իրավիճակն է, որի մասին դարձյալ մի քանի առիթով խոսել եմ:
Հայաստանի իշխանության՝ Ռուսաստանի դեմ չհաշվարկված ու արկածախնդիր դեմարշը, բոլոր «ձվերը» Արևմուտքի նեոլիբերալ շախմբերի «զամբյուղում» տեղադրելու անհեռատեսությունը, Արևմուտքում «փրկիչներ» փնտրելու մոլորությունը Հայաստանն ավելի անպաշտպան ու, ըստ էության, մենակ են թողել Բաքվի ագրեսիվ օրակարգի դեմ՝ խրախուսելով Ալիևի ու նրա վարչակազմի հավակնությունները:
Menu
