«Դուք երևի ճիշտ չեք ընկալել իմ պատասխանը, ոչ թե ակցիային ենք մասնակցելու: Մենք ժողովրդի կողքին ենք լինելու, որպեսզի խախտումներ չլինեն, բռնություններ չլինեն: Այդ դեպքում ԲՀԿ պատգամավորները կլինեն ժողովրդի կողքին: Մենք չենք ասել՝ պիտի մասնակցենք քայլերթին, մենք ասել ենք, որ եթե բռնություն լինի, անմիջապես կտեսնեք, որ Նաիրա Զոհրաբյանը, Սերգեյ Բագրատյանը կլինեն ժողովրդի կողքին»,- սեպտեմբերի 12-ին լրագրողների հետ զրույցում ասաց ԲՀԿ առաջնորդ Գագիկ Ծառուկյանը՝ ի պատասխան այն հարցի, թե ինքը Ամուլսարի շահագործման հարցով ե՞րբ է միանալու ժողովրդին:
Պատասխանելով վերջին օրերին շրջանառվող նոր ընդդիմադիր բևեռի հնարավոր ձևավորման և վերաբերյալ հարցին, Գ. Ծառուկյանն ասաց, որ ամեն ոք իրավունք ունի կուսակցություն բացելու, քաղաքական գործունեությամբ զբաղվելու:
«Դա կախված է իր ապրածից, իր գործունեությունից և ժողովրդի մոտ վստահությունից: Այնպես չէ, որ այսօր արթնացավ ու դարձավ քաղաքական գործիչ կամ մրցակից:
Իսկ թե արտախորհրդարանական ընդդիմությունը կարո՞ղ է իրենց մրցակից լինել, Գ. Ծառուկյանը նկատեց.«Կարող եք ժողովրդին հարցնել, մենք ինքնագովազդով չենք զբաղվում»:
Այն հարցին, թե ինքը տեսնո՞ւմ է հեղափոխությունը հեղափոխականներից պաշտպանելու անհրաժեշտություն, ինչի մասին ասել էր Արման Բաբաջանյանը, ԲՀԿ առաջնորդը նշեց. «Ես ոչ մի բան էլ չեմ տեսնում: Ամեն մարդ ասում է իր կարծիքը».-ամփոփեց ԱԺ պատգամավորը:
