Ախալքալաքի Ազատության փողոցի սկզբնամասում միջադեպ է եղել, որի տեսագրությունը հայտնվել է համացանցում։
Կադրերում երևում է, որ ոստիկանները մեքենայից բռնի դուրս են բերում վարորդին՝ Ախլքալաքի բնակիչ Մեխակ Խաչատրյանին, տապալում են գետնին, ծեծի ենթարկում եւ ձերբակալում։
Ընդ որում՝ այդ ամենը տեղի է ունենում նրա ընտանիքի ներկայությամբ, հարազատներից մեկը փորձում է միջամտել, սակայն ոստիկանները նրան կոպտորեն եւ բռնություն կիրառելով հեռացնում են։
Երիտասարդի տատը, որ այդ ծեծի ականատեսն էր, պատմում է. «Իմ ներկայությամբ թոռիս ծեծեցին, հետո հրացանը դրցեին նրա ճակատին»:
Այս դեպքին արձագանքել է Սամցխե-Ջավախքի և Քվեմո Քարթլիի հայկական հասարակական կազմակերպությունների խորհուրդը՝ կոչ անելով Վրաստանի իշխանություններին բացառել անհամաչափ ուժի և ստորացուցիչ մեթոդների կիրառման դեպքերը։
Խորհրդի հայտարարության մեջ, մասնավորապես, ասված է․
«Ախալքալաքում հունիսի 6-ին տեղի հայ բնակիչների և ազգությամբ վրացի պարեկային ոստիկանության միջև տեղի ունեցած միջադեպը, որի ընթացքում ոստիկանները ցուցաբերել են առանձնակի դաժանություն, առաջին դեպքը չէ Ջավախքում։ Ականատեսների վկայությունները, առկա տեսանյութերը խոսում են այն մասին, որ դիմադրություն ցույց չտվող և անզեն բնակչի նկատմամբ զինված և մեծաթիվ ոստիկանները կիրառել են բռնություն։ Վերջիններս, բոլորովին հաշվի չառնելով այն հանգամանքը, որ դեպքի վայրում եղել են տուժողի ընտանիքի անդամները, կանայք և երեխաները, Ախալքալաքի բնակիչ Մեխակ Խաչատրյանին գետնին են տապալել և ստորացուցիչ մեթոդներով ծեծի ենթարկել։
Սամցխե-Ջավախքի և Քվեմո Քարթլիի հայկական հասարակական կազմակերպությունների խորհուրդը փաստում է, որ այս երևույթը լրացուցիչ լարվածություն է ծնում առանց այն էլ բազմաթիվ խնդիրների առաջ կանգնած ջավախահայության շրջանում։ Չհաստատելով, որ այս երևույթն ունի ուղղորդված բնույթ, այդուհանդերձ, Խորհուրդը փաստում է, որ նման դեպքերը հաճախակի են դառնում հենց Ախալքալաքի և Նինոծմինդայի շրջաններում։
Ելնելով վերոնշյալից՝ հայկական կազմակերպությունների խորհուրդը կոչ է անում Վրաստանի իշխանություններին և երկրի իրավապահ մարմիններին՝ ցուցաբերել առանձնակի զսպվածություն, հասարակ ազգաբնակչության հանդեպ բացառել անհամաչափ ուժի և այլ ստորացուցիչ մեթոդների կիրարկման այսպիսի դեպքերը, որոնք կարող են շեշտակի մեծացնել լարվածությունը հայաբնակ տարածաշրջանում, հասարակության շրջանում խորացնել անվստահությունը երկրի իշխանությունների և իրավապահ մարմինների հանդեպ, ինչպես նաև սպառնալ երկրի կայունությանը»։
