«Ռեստարտ» նախաձեռնության անդամներ Դավիթ Պետրոսյանին և Դավիթ Սիմոնյանին մեղադրանք է առաջադրվել: Այս մասին հայտնել է ՀՀ գլխավոր դատախազության հանրային կապերի բաժնի պետ Արևիկ Խաչատրյանը. ««Ռեստարտ» նախաձեռնության անդամներ Դավիթ Պետրոսյանին և Դավիթ Սիմոնյանին մեղադրանք է առաջադրվել՝ ՀՀ ՔՕ-ի 34-131 հոդվածի 2-րդ մասի 1-ին կետի հատկանիշներով՝ մի խումբ անձանց կողմից նախնական համաձայնությամբ առևանգման փորձ կատարելու հատկանիշներով»,-նշել է նա:
Հիշեցնենք, որ հայտնի միջադեպից հետո Նարեկ Մալյանը հայտնել էր իր վրա հարձակման մասին՝ հայտարարելով, որ դա առևանգման փորձ էր: Ավելի ուշ խմբի անդամները խոստովանել էին, որ միջադեպ եղել է, անգամ տեսանյութ էին հրապարակել և հայտնել, որ ցանկացել են Մալյանին գցել աղբամանը:
Նույն գործի շրջանակներում «Ռեստարտի» ևս չորս անդամի՝ Արամայիս Պետրոսյանի, Գարիկ Միսկարյանի, Յուրի Ավագյանի ու Հրաչյա Խլղաթյանի նկատմամբ խափանման միջոց է ընտրվել ստորագրություն չհեռանալու մասին:
