Գեղարքունիքի մարզպետի տեղակալ Անուշավան Ղազարյանն ընդունեց ֆրանսիական «Bonheur Retrouvé» բարեգործական կազմակերպության ներկայացուցիչներին։ Հանդիպման նպատակն էր ծանոթանալ Գեղարքունիքի մարզում գործող կրթական հաստատությունների շենքային պայմաններին և անհրաժեշտության դեպքում ցուցաբերել աջակցություն:
Կազմակերպությունը, ինչպես ներկայացվեց, գործում է Փարիզում: Կազմակերպության կողմից նախաձեռնվում և ֆրանսիական տարբեր քաղաքների հայաշատ վայրերում անցկացվնել համերգներ, որից գոյացած հասույթը կուղղվի հայկական կրթամշակութային ոլորտներում բարեգործական ծրագրերի իրականացմանը: Մարզպետի տեղակալը բարձր գնահատեց կազմակերպության կողմից ցուցաբերվող նմանատիպ նախաձեռնությունը, նշելով, որ Գեղարքունիքի մարզպետարանը պատրաստակամ է իր լիազորությունների շրջանակներում համագործակցություն ծավալել:
Անուշավան Ղազարյանը ֆրանսիական «Bonheur Retrouvé» բարեգործական կազմակերպության ներկայացուցիչներին առաջարկեց ծանոթանալ Գեղարքունիքի մարզի առավել անմխիթար շենքային պայմաններ ունեցող հանրակրթական դպրոցների ցանկին և կատարել ուսումնասիրություն: Դրանց արդյունքները կամփոփվեն հերթական քննարկման ընթացքում:
Գեղարքունիքի մարզպետարանի տեղեկատվության վարչություն
