ԱՊՀ երկրների ինստիտուտի փոխտնօրեն Վլադիմիր Ժարիխինը հայտարարել է, որ մինչ Հավաքական անվտանգության պայմանագրի կազմակերպության անդամ երկրներին դիրքորոշումները կոնսոլիդացնելու կոչեր հղելը՝ Հայաստանը պետք է նախևառաջ Ղրիմը ճանաչի Ռուսաստանի Դաշնության տարածք:
Այսպիսով՝ նա անդրադարձել է օրերս «Ռոսիա-24» հեռուստաալիքին տված ՀՀ վարչապետի ժամանակավոր պաշտոնակատար Նիկոլ Փաշինյանի հարցազրույցին, որն ասել էր, որ երկար տարիներ Հավաքական անվտանգության պայմանագրի կազմակերպության անդամ որոշ երկրներ միջազգային կազմակերպություններում քվեարկում են Հայաստանի շահերի դեմ: Նա կոչ էր արել ռազմական դաշինքի գործընկերներին կոնսոլիդացնել դիրքորոշումները:
«Ես կարծում եմ, որ պարոն Փաշինյանը ցանկալի է այդ հարցին վերադառնա այն ժամանակ, երբ Հայաստանը ճանաչի Ղրիմը Ռուսաստանի Դաշնության տարածք: Իսկ մինչ այդ նման հայտարարությունները մի քիչ տարօրինակ են թվում»,- rusarminfo.ru-ին տված հարցազրույցում ասել է Վլադիմիր Ժարիխինը:
Քաղաքագետի կարծիքով՝ «չճանաչել ՀԱՊԿ-ի գծով ռազմաքաղաքական դաշնակցի տարածքային ամբողջականությունն ու միևնույն ժամանակ միջազգային կազմակերպություններում քվեարկության հարցով պահանջներ ներկայացնելն այդքան էլ ճիշտ չէ»:
Հիշեցնենք, որ Հայաստանի Հանրապետության վարչապետի ժամանակավոր պաշտոնակատար Նիկոլ Փաշինյանը հարցազրույց է տվել «Ռոսիա 24» հեռուստաալիքին՝ անդրադառնալով մի շարք հարցերի, այդ թվում՝ Հավաքական անվտանգության պայմանագրի կազմակերպությանը (ՀԱՊԿ): Փաշինյանն ընդգծել է, որ ՀԱՊԿ-ը լուրջ նշանակություն ունի Հայաստանի համար:
«Այնպես է ստացվել, որ ՀԱՊԿ շրջանակում մեր գործընկերներից շատերը երկար տարիներ տարբեր միջազգային կազմակերպություններում քվեարկում են Հայաստանի շահերի դեմ: Բայց միևնույն ժամանակ նրանք չեն կարող մեզ կշտամբել այդ կազմակերպություններում իրենց դեմ քվեարկելու համար: Մենք ասում ենք, որ ստեղծված իրավիճակում պետք է սինքրոնավորել մեր դիրքորոշումները, հասկանալ՝ մեկս մյուսիս առաջ ինչ պարտավորություններ ունենք»,-ասել է Նիկոլ Փաշինյանը:
