Այսօր Հունաստանի լրատվամիջոցների և թերթերի աշխատակիցների արհմիություններն անցած չորեքշաբթի հայտարարված համազգային գործադուլի շրջանակում 24-ժամյա գործադուլ են սկսել, գրում է РИА Новости գործակալությունը:
Արհմիությունների ղեկավարության որոշման համաձայն` այսօր տեղական ժամանակով առավոտյան ժամը 6-ից մինչև վաղն առավոտյան 6-ը պետական և մասնավոր հատվածների բոլոր լրատվամիջոցների, հանրային հեռուստատեսության, տեղեկատվության հարցերով գլխավոր քարտուղարության և գերատեսչությունների մամուլի ծառայությունների աշխատակիցները գործադուլ են անելու:
Կդադարեցվեն ռադիոյով և հեռուստատեսությամբ լուրերի թողարկումները, լրատվական կայքերի մեծ մասը չի աշխատի:
Համազգային գործադուլի շրջանակում Աթենքում չի գործի նաև հասարակական տրանսպորտը:
Themanews կայքի փոխանցմամբ՝ գործադուլի մասնակիցները պահանջում են կառավարությունից հավասար իրավունքներով հավաքական աշխատանքային պայմանագրեր, աշխատավարձերի և կենսաթոշակների բարձրացում, ինչպես նաև Հունաստանում նվազագույն աշխատավարձի բարձրացում՝ կրկին 751 եվրո:
РИА Новости-ն էլ գրում է, որ լրագրողները պահանջում են նաև պետական երաշխիքներով սոցիալական ապահովության, անվճար առողջապահության իրավունք, 2019թ.-ի բյուջեի նախագծում անհապաղ փոփոխություններ և այլն:
Լրատվամիջոցների աշխատակիցների պահանջներից է նաև մամուլի ազատությունը:
