Ռուսաստանում տեղի ունեցած ավտովթարի հետևանքով դատապարտված և պատիժը կրելու համար Հայաստան տեղափոխված վարորդ Հրաչյա Հարությունյանը նոյեմբերի 6-ին համաներմամբ ազատ է արձակվել: «Արմենպրես»-ի հետ զրույցում այս մասին հայտնեց Հրաչյա Հարությունյանը:
Հարցին` թե ինչպե՞ս է իրեն զգում, Հրաչյա Հարությունյանը պատասխանեց.
« Ինձ լավ եմ զգում, տրամադրությունս էլ է լավ: Ինչպես կարող եմ վատ լինել, երբ արդեն ազատության մեջ եմ: Շնորհակալ եմ բոլորից, ովքեր ինձ օգնել և աջակցել են», -ասաց Հարությունյանը:
2013թ. հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղևորատար ավտոբուսին, ինչի հետևանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել: Հրաչյա Հարությունյանը Ռուսաստանում 6 տարի 9 ամիս ժամկետով ազատազրկման էր դատապարտվել: 2017թ. հուլիսի 20-ին Հրաչյա Հարությունյանը տեղափոխվել էր Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը կրելու համար:
Ավելի ուշ, 2018 թվականի հուլիսին դատարանը որոշում էր կայացրել պատժի կրումն ազատ ռեժիմով շարունակելու վերաբերյալ` հաշվի առնելով այն հանգամանքը, որ վերջինը ընտանիքի միակ կերակրողն է:
