Այսօր՝ հոկտեմբերի 4-ին, ՀՀ կառավարության նիստում առաջարկվեց անփոփոխ թողնել Քրեական օրենսգրքի 69-րդ հոդվածի 3-րդ մասը, համաձայն որի՝ մինչև դատավճռի օրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման, կարգապահական գումարտակում պահելու ձևով նշանակված պատժին՝ մեկ օրը հաշվելով մեկ օրվա դիմաց: Որոշման նախագիծը ներկայացրեց ՀՀ արդարադատության նախարար Արտակ Զեյնալյանը:
Նշենք, որ Ազգային ժողովի «Ելք» խմբակցության պատգամավոր Էդմոն Մարուքյանը առաջարկում էր փոփոխել տվյալ հոդվածը՝ «1 օրը հաշվելով 1,5 օրվա դիմաց» ձևակերպմամբ: Նախատեսվում էր նաև նախագծին տալ հետադարձ ուժ:
«Մեղադրյալները կգերադասեն, որ իրենց նկատմամբ որպես խափանման միջոց ընտրվի կալանավորումը, քանի որ այդ դեպքում նրանք ավելի քիչ կգտնվեն քրեակատարողական հիմնարկում դատապարտյալի կարգավիճակում: Նախագծով կարգավորված չէ այն հարցը, թե դրա ընդունման արդյունքում ինչպես վարվել այն դատապարտյալների հետ, որոնց պատժի վերահաշվարկի արդյունքում կստացվի, որ դատարանի կողմից սահմանված պատժից ավելի ժամկետով «գտնվել են» քրեակատարողական հիմնարկում», – ասված է որոշման նախագծում:
Վարչապետ Նիկոլ Փաշինյանն ասաց․-«Նախագիծն առաջարկելու հիմնական շարժառիթը բեռնաթափումն է, նաև ինչ-որ կապ կա համաներման հետ: Մենք նախատեսում ենք համաներում հայտարարել և մեզ մոտ, իսկապես, հիմա կալանքի կիրառման պրակտիկան փոխվել է, և ավելի քիչ թվով մարդիկ են կալանավորվում»
Նա ընդգծեց՝ ընդհանրապես՝ քրեակատարողական հիմնարկի գերբեռնվածության խնդիրը լիարժեք լուծված է:
