Կառավարության շենքի մոտ բողոքի ակցիա են անում Առինջ մոլի աշխատակիցները՝ պահանջելով հագուստ ներկրողների համար նվազեցնել մաքսային վճարները: Նրանց խոսքով՝ քաշի համար մաքսազերծման գները թանկացել են, մեկ կգ համար հասնելով 4.5 դոլար: «Մինչև Նորֆոլկը 2 դոլար էր, Նորֆոլկը եկավ, դարձավ 3 դոլար, իսկ հեղափոխությունից հետո փոխանակ նվազեր, ընդհակառակը, դարձավ 4.5 դոլար»,- դժգոհեցին առևտրականները:
«Համերաշխություն» ՀԿ նախագահ Արմեն Ներսիսյանը, ով ակցիայի կազմակեպիչն է, ասաց, որ սուս ու փուս կանգնեն կառավարության շենքի մոտ, մինչև վարչապետ Նիկոլ Փաշինյանն իջնի.«Թանկացումները լավ տեղ չեն տանելու: Էս խեղճ վիճակում կարիք կա՞ր էս պահին թանկացնել»,- ասաց «Համերաշխություն» ՀԿ նախագահ Արմեն Ներսիսյանը`ավելացնելով. «Տեղից մարդկանց վիճակը վատ ա, վարկերի տակ են: Կրթության նախարարն էլ ընենց օյին բերեց էս խեղճ ժողովրդի գլխին, փոխանակ շուտ ասեր՝ սև ու սպիտակ շորեր մի բերեք, մարդիկ գնացին, բերեցին, հետո նոր օրենք հանեց, որ դպրոցներում ազատ գրաֆիկ ա: Խեղճերի վրա սաղ սև ու սպիտակ շորերը մնացել են»,- ասաց նա: Արմեն Ներսիսյանը բոլոր տոնավաճաների աշխատակիցներին կոչ արեց գալ կառավարության շենքի մոտ ու միանալ ակցիային:
Առևտրականները հայտարարեցին, որ մինչև երեկո կմնան, չեն գնա, մինչև վարչապետն իրենց չընդունի:
