Life.panorama.am-ի զրուցակիցն է երգչուհի Լիլիթ Կարապետյանը: Նրանից հետաքրքրվել ենք վերջին ամիսների էկրանային լռության պատճառներից, ինչպես նաև խոսել այսօրվա հայկական շոու բիզնեսի մասին:
«Լռությունս իսկապես միայն էկրանային է, քանի որ շարունակում եմ ամեն օր երգել երևանյան ակումբներից մեկում: Ինչ վերաբերվում է նոր երգին և տեսահոլովակին, որը կչեղարկի էկրանային լռությունս, ապա ասեմ, որ դա ևս աչքաթող չեմ արել, և այս պահին սպասում եմ երգահաններին, որոնց արդեն իսկ խնդրել եմ ինձ համար մի նոր երգ գրել: Խոսել եմ իմ լավ ընկերներ Ռիչարդ Մադլենյանի, Րաֆֆի Ալթունյանի և Էդգար Ալեքսանյանի հետ, խնդրել եմ ինձ համար մի լավ երգ ստեղծեն, այնպես որ նրանցից լավ լուրի եմ սպասում»,- նշեց Լիլիթն ու պատմեց, որ վերջերս իր ֆեյսբուքյան էջում հարցում է անցկացրել, որպեսզի պարզի, թե իր երկրպագուները առաջիկայում ի՞նչ ոճում են ուզում իրեն տեսնել:
«Հայկական ռիթմերով երգեր շատ եմ սիրում, միջոցառումների ժամանակ ինքս էլ հաճույքով դրանց ներքո ուրախանում եմ, բայց նման երգեր ինքս չեմ կատարի, քանի որ դրանք չեն համապատասխանում իմ ոճին: Ես երբեք ոչ մեկին չեմ քննադատել, դեմ չեմ խոսել 6/8 չափի երաժշտությանը, և երբեք չեմ ընդունել այն երգիչ-երգչուհիներին, ովքեր քարկոծում են իրենց կոլեգաներին նման երգեր կատարելու համար: Դա ոչ մեկի խնդիրը չէ, եթե չեն ցանկանում իրենք երգեն, թող չերգեն, ինչպես ինքս եմ անում: Ես միայն դեմ եմ եղել թուրքական մելիզմներին, թուրքական լադին: Անձամբ ես երբեք իմ ոճը չեմ փոխել, և չեմ կարծում, որ ինձ կհամապատասխաներ նման երաժշտությունը: Ապագայում կարող եմ ինքս էլ տոնական շնորհավորանքի երգ կատարել, բայց դա անպայման պետք է իմ ոճում լինի: Այսինքն` դա կլինի զուտ շնորհավորանք, որի մեջ չի շեշտվի հարսանիք, կնունք և նման այլ երևույթները»:
«Մեր հիմքն իսկապես շատ ամուր է եղել: Մենք ինքնուս ստեղծագործող մարդիկ էինք, որոնք եկան այս ասպարեզ, երբ չունեին մեծ գումարներ, չկար համացանց, բայց կարողացան հայտնի դառնալ և ձեռք բերել հանրության սերը, որը, փառք Աստծո, մշտական դարձավ: Այո, այսօր գումարով շատ երգեր կարող ես թողարկել, բայց հանրության սերը փողով չես գնի: Իմ ստեղծագործական կյանքում եղել են նաև միջանցիկ դադարներ, բայց փառք Աստծո, չեմ մոռացվել և դա վերագրում եմ հենց այս ասպարեզում իմ հիմքին»,- նկատեց նա:
Հարցին, թե երգչուհին ի՞նչ գնահատական կտա մերօրյա հայկական շոու բիզնեսին, պատասխանեց.
«Ես ոչ մեկի չեմ մեղադրում, ինձ իրավունք չեմ վերապահում այդ ոլորտում այսօրվա թերացումները բարդել կոնկրետ մարդկանց վրա: Ըստ իս` այդ ամենի պատճառը մեր երկրում տիրող վիճակն է: Կարծում եմ` այսօր ոչ մի ոլորտ իր տեղում չէ, քանի որ ամեն մեկն իր գործով չի զբաղվում: Եթե բժիշկը բժկություն աներ, հաղորդավարը` միջոցառոմներ վարեր, երգչն էլ երգեր, այլ ոչ թե նրանք և այլ մասնագետներ տարբեր գործերով զբաղվեին, ապա գուցե ամեն ինչ շատ ավելի լավ լիներ: Մեր ոլորտը չարիքի փոքրագույնն է, այսօր գումարով ավարտած բժիշկը խաղում է մարդկանց կյանքի հետ, մենք գոնե կյանքեր չենք վնասում: Ամեն դեպքում, այս ամենը ինձ իսկապես շատ է հուզում ու ցավ պատճառում»:
Արդեն քանի տարի է, ինչ Լիլիթն իր անձնական կյանքը մղել է երրորդ պլան` առաջին տեղը հատկացնելով որդուն, երկրորդը` սիրելի աշխատանքին: Հարցին, թե երգչուհին չի՞ ցանկանում վերջապես մտածել նաև անձնական կյանքի մասին, պատասխանեց.
«Իսկապես, անձնական կյանքս երրորդ պլանում է, բայց այդ հարցում երբեք չեմ փոշմանել: Այո, իմ կյանքը ես նվիրեցի կարիերային, հետո նաև որդուս, ով կյանքիս իմաստն է, բայց երևի ամեն կին էլ երեխայից հետո մոռանում է իրեն: Երգավեստի պատճառով ամբողջ կյանքում անձնականս տուժել է, բայց դրա համար ես չեմ զղջում: Կարծում եմ` կյանքը դեռ առջևում է և ես կարող եմ դեռևս երջանիկ լինել: Իսկ եթե հանկարծ չգա այդ պահը, ուրեմն այդպես էր պետք: Ես հավատում եմ ճակատագրին, թեև ընդունում եմ նաև, որ մենք ազատ ենք մեր որոշումներում»:
life.panorama.am
