Սուրբ ծննդյան պատարագից Սերժ Սարգսյանի բացակայությունը պաշտոնապես մեկնաբանվեց վերջինս թեթեւ մրսածությամբ: Այդ ընթացքում, սակայն հերքվեց տեղեկությունը, թե Սերժ Սարգսյանն այցելել է «Նաիրի» բժշկական կենտրոն: Այդպես էլ անհայտ մնաց, թե ինչ է պատահել Սերժ Սարգսյանին: Եւ մինչ փորձում էինք Սերժ Սարգսյանի առողջական խնդիրների հետքերով գնալ, բախվեցինք սենսացիոն տեղեկատվության,- գրում է Armtimes կայքը:
«Հայկական ժամանակ»-ին հայտնի դարձավ, որ Սարգսյանը հունվարի առաջին օրերին իսկական վոյաժների մեջ է եղել:
Պարզվում է, որ Սերժ Սարգսյանը հունվարին 3-ին եղել է Մոսկվայում, դրանից առաջ, 1-2-ին՝ Եվրոպական երկրներից մեկում: Թե որն է եղել Մոսկվա եւ Եվրոպա մեկնելու նպատակը, մեզ չհաջողվեց պարզել: Համենայնդեպս, Սարգսյանի՝ երկրից բացակայելու վերաբերյալ տեղեկատվությունը նախագահականը սահմանված կարգով չի ներկայացրել հանրությանը: Բացի այդ, նախագահի խոսնակ Վլադիմիր Հակոբյանը երեկվանից համառորեն չի պատասխանում մեր զանգերին, ուստի այսօր եւս նրանից մեկնաբանություն ստանալ չհաջողվեց սույն տեղեկության վերաբերյալ:
Սովորաբար Սերժ Սարգսյանի գործուղումների, ինչպես նաեւ արձակուրդի մեկնելու մասին տեղեկատվությունը տեղադրվում է նախագահական նստավայրի պաշտոնական կայքում: Դեկտեմբերի 31-ից հետո մինչ օրս միայն մեկ հաղորդագրություն է տարածվել, այն էլ՝ այսօր ֆինանսների նախարարին ընդունելու մասին: Սրանից առնվազն կարելի է եզրակացնել, որ Սերժ Սարգսյանը հաղթահարել է թեթեւ մրսածությունը եւ վերադարձել աշխատանքային ռեժիմի:
Երեկ Armtimes-ը գրել էր, որ Սերժ Սարգսյանը չի մասնակցել Սուրբ Պատարագին, Ռիտա Սարգսյանը միայնակ էր Մայր Աթոռում: Դրանից հետո «Ժամանակ» օրաթերթը գրեց, որ Սարգսյանն առողջական խնդիրներ ունի եւ գտնվել է «Նաիրի» ԲԿ-ում: Բժշկական կենտրոնից մեր զրույցում հերքեցին այդ լուրը, իսկ Սերժ Սարգսյանի մամուլի խոսնակ Վլադիմիր Հակոբյանը «aysor.am»-ին տված մեկնաբանությունում ասել էր, որ Սարգսյանի մոտ թեթեւ մրսածություն է եղել եւ գտնվել է տանը:
