Ինչպես տեղեկացրել էինք, դասադուլի մասնակիցներից Դավիթ Պետրոսյանն ու ևս 3 ուսանողներ այսօր հացադուլ են սկսել ԵՊՀ ֆիզիկայի ֆակուլտետի լսարաններից մեկում: Նրանք հորդորում են համալսարանի ղեկավարությանն ու ուսանողներին՝ չմոտենալ լսարանի դռանը, և չդիմել սադրանքների. «Որոշել ենք դուռը չբացել: Եթե լինեն մարդիկ, ովքեր ցանկանան միանալ մեզ, էլի չենք բացելու»,-նշել է Դավիթը՝ դռան հակառակ կողմից: «Գիշերելու ենք այստեղ, մեզ հետ բարձր ենք բերել, վերմակ, ջուր, հեռախոս, հիգիենայի պարագաներ»,- տեղեկացրել է հացադուլ հայտարարած մյուս ուսանողը:
Նրանց այսօր այցելել է «Ելք» խմբակցության պատգամավոր Արարատ Միրզոյանը: Նա փորձել է համոզելով, որ դադարեցնեն հացադուլը: Սակայն լսարանից դուրս գալուց հետո ԱԺ պատգամավորը նշել է, որ ուսանողները հաստատակամ են իրենց որոշման մեջ. «Նրանք շատ առողջ են պետք մեր հասարակությանը և՛ այս, և՛ այլ պայքարների համար: Թեև իրենք շատ հաստատակամ են իրենց որոշման մեջ, բայց ես կփորձեմ շարունակել համոզել, որ դադարեցնեն»,-փոխանցել է Միրզոյանը:
Հացադուլ հայտարարած ուսանողները պատրաստ են այն դադարեցնել միայն այն դեպքում, երբ կկասեցվի տարկետման իրավունքը սահմանափակող օրինագիծը:
